News

ATM માંથી નીકળ્યા 5 ગણા રૂપિયા, લોકોએ કેશ ઉપાડવા કરી પડાપડી..!

મહારાષ્ટ્રમાં બની ઘટના નાશિક: બેંકના ATMમાંથી નકલી નોટો નીકળવાની તો ઘણી ફરિયાદો સામે આવતી હોય છે, પરંતુ મહારાષ્ટ્રમાં તો એક…

મહારાષ્ટ્રમાં બની ઘટના

નાશિક: બેંકના ATMમાંથી નકલી નોટો નીકળવાની તો ઘણી ફરિયાદો સામે આવતી હોય છે, પરંતુ મહારાષ્ટ્રમાં તો એક એટીએમ મશીનમાં જેટલી રકમ નાખો તેના પાંચ ગણા રુપિયા બહાર આવતા લોકોએ રુપિયા ઉપાડવા માટે એટીએમ પર પડાપડી કરી મૂકી હતી.

આખા વિસ્તારમાં ફેલાઈ ગઈ વાત

મહારાષ્ટ્રના નાશિકના વિજયનગરમાં એક્સિસ બેંકના એટીએમમાં પૈસા લોડ કરીને સ્ટાફ જેવો રવાના થયો કે, એટીએમમાંથી પાંચ ગણા રુપિયા નીકળવાનું શરુ થઈ ગયું હતું. આ વાત પળવારમાં જ આગની જેમ આખા વિસ્તારમાં ફેલાઈ ગઈ હતી, અને જોતજોતામાં તો એટીએમ પર પૈસા ઉપાડવાની લાંબી લાઈન લાગી ગઈ હતી.

કલાકમાં જ આટલા લાખ ઉપડી ગયા

મફતના રુપિયા લેવા લોકો કામધંધા છોડીને પણ કેવા તૂટી પડે છે તેનું શ્રેષ્ઠ ઉદાહરણ આ કિસ્સામાં જોવા મળ્યું હતું. બેંક અધિકારીઓના જણાવ્યા અનુસાર, જેવી લોકોને ખબર પડી કે અહીંના એટીએમમાંથી પાંચ ગણું કેશ મળી રહ્યું છે કે તેના એક જ કલાકમાં 2.63 લાખ રુપિયા જેટલી રકમ લોકોએ ઉપાડી લીધી હતી. સામાન્ય દિવસોમાં તો આખા દિવસમાં પણ આટલું વિડ્રોઅલ નથી થતું.

પોલીસ તાત્કાલિક દોડી આવી

આ ઘટનાની આખરે પોલીસને જાણ થતાં પોલીસ તાબડતોબ દોડી આવી હતી, અને તપાસ કરતા એટીએમમાંથી ખરેખર જેટલી રકમ નાખો તેના પાંચ ગણા રુપિયા નીકળતા હોવાનું જાણવા મળ્યું હતું. પોલીસે તરત જ બેંકના અધિકારીઓને આ અંગે જાણ કરી હતી, અને એટીએમને બંધ કરી દેવામાં આવ્યું હતું.

આ કારણે ATMમાં થઈ ગફલત

બેંકના અધિકારીઓએ એટીએમમાંથી કઈ રીતે વધારે રુપિયા નીકળી રહ્યા છે તેની તપાસ કરતા બહાર આવ્યું હતું કે, સોમવારે સાંજે ચાર વાગ્યે આ એટીએમમાં કેશ લોડ કરવામાં આવ્યું હતું. જોકે, તે વખતે સ્ટાફે ભૂલથી 500 રુપિયાની નોટો રાખવાની ટ્રેમાં 2000ની નોટો મૂકી દીધી હતી. જેથી 500 રુપિયા સિલેક્ટ કરો તો મશીનમાંથી 2000ની નોટ નીકળતી હતી.

ઘણીવાર આવા કિસ્સા બની ચૂક્યા છે

બેંકના ટેકનિશિયનોએ તરત જ આડી-અવળી થઈ ગયેલી નોટોને ફરી તેની જગ્યાએ મૂકી દેતા એટીએમ મશીન નોર્મલી કામ કરતું થઈ ગયું હતું. ઉલ્લેખનીય છે કે, આવી ઘટનાઓ અગાઉ પણ પ્રકાશમાં આવી ચૂકી છે. જેમાં ઘણીવાર નોટો ખોટી ટ્રેમાં મૂકી દેવાથી એટીએમ મશીનમાં જે રકમ એન્ટર કરી હોય તેનાથી અલગ જ કેશ બહાર આવે છે.

બધા પાસેથી પૈસા વસૂલ થશે

એટીએમમાંથી પાંચ ગણા રુપિયાની જાણ થતાં જે લોકો એક કલાક દરમિયાન આ એટીએમમાંથી રુપિયા ઉપાડી ગયા છે, તેમનો તમામ ડેટા બેંક પાસે ઉપલબ્ધ છે. હાલ તેઓ ભલે વધારે રુપિયા લઈ ગયા હોય, પરંતુ બેંક આ તમામ લોકો પાસેથી વધારાના રુપિયા વસૂલ કરશે.

loading...